घूंघट प्रथा पर अनोखी रचना

-------------(घूँघट)------------

सुबै   स्याम   दोपार  डावड़ी, 

मुँडै   घूँघट    सार   डावड़ी l

मूंडो   ढकणु  काण  काईदो, 

थारै   खातर  भार   डावड़ी l

घूँघट  जै  माथै   सरक्यौ  तो, 

काडै  गाळ्यां  च्यार डावड़ी l

रूढ़िवाद  री   लीक   पीटर्यां,

सास  ससुर  भरतार डावड़ी l

घूँघट  अाज   अज्ञान  अंधेरों, 

कियां  पड़सी   पार  डावड़ी l

भरी  दोपारी काम  करै  नित, 

इण  घूँघट  कै भार  डावड़ी l

घूँघट  लारै  सबळा   छिपग्यां, 

गैणूं  और  सिंणगार  डावड़ी l

घूँघट  मैट,  मान  रख  छोको, 

घर  गृहस्थी  रौ  सार डावड़ी l

बेटी  बहू  बण  दो  कुण  त्यारै, 

थारै   स्युं   परिवार    डावड़ी l

हिळमीळ सबळा हेत राखीज्यै,

मन  उमंग  झंणकार   डावड़ी l

घूँघट   मैट  रख  ज्ञान   चांदणूं 

तु   तो   है   हकदार   डावड़ी l

             .....©®ओम"बटाऊ"